Mësimi me dy turne s’është produktiv, thonë ekspertët

Mësimi me dy turne sipas ekspertëve të arsimit nuk është produktiv.

Eksperti i arsimit, Qemal Çejku dhe mësuesja Luiza Myrtaj Nezha u shprehën për “Mirëmëngjes” në Euroneës Albania se në mbrëmje fëmijët shkojnë të lodhur në shtëpi dhe paradite prindërit janë në punë kështu që nuk mund t’i ndihmojnë me detyrat.

Nezha tregoi se arsyeja e vetme se pse zhvillohet mësim me dy turne nëpër shkolla është mungesa e infrastrukturës, ndërsa Çejku theksoi se nuk janë problem dy turnet aq sa është problem se si zhvillohet mësimi në pjesën e parë dhe të dytë të ditës, pra a është mjaftueshëm ora për të nxënin e fëmijës.

“Buxheti është pjesa e patolerueshme, infrastruktura e shkollave është emergjencë nëse do të kërkojmë cilësi në arsim. Na uli shumë kredite dhe pjesa e pandemisë,” – tregoi eksperti i arsimit ndërsa fliste për çështjet urgjente që duhen trajtuar.

Ndërkohë Nezha ngriti shqetësimin për brezat e ardhshëm në këtë profesion dhe zhvillimin profesional të mësuesve.

“Sot që jemi, mësuesit që kërkojnë të konkurrojnë në portalin ‘Mësues për Shqipërinë’, në datën 20 hapet portali, pra hapet plotësimi i dosjeve dhe nuk kemi kreditë,” – tregoi ajo.

Mësuesja solli në vëmendje se nga dhjetori i 2021-shit janë në pritje të krediteve.

LEXONI GJITHASHTU:

• 131 shkolla kanë mësim me turne, 31 në Tiranë