Mësuesi nga Puka i pasionuar me prodhimin e veglave muzikore tradicionale

Çiftelinë dhe lahutën nuk i ndan dot. Është rritur me to, si çdo familje në malësinë e Pukës dhe ajo e Gjelosh Alisë i mbante këto vegla muzikore të varura në mur, në anë të oxhakut të kullës.

66-vjeçari na thotë se ka mësuar t’i bjerë çiftelisë që në klasë të 5 dhe ka nostalgji për rrethet artistike që funksiononin në atë kohë në çdo shkollë.

“Dëgjoja një melodi të radio Kukësi e nxitoja të shkoja në shtëpi, të merrja çiftelinë dhe të luaja”, u shpreh ai.

Gjelosh Alia nuk ndan dot as letërsinë dhe muzikën, pasi për 44 vjet ka punuar si mësues letërsie. Sot lexon te punishtja e tij modeste ku prodhon vegla muzikore kryesisht çifteli.

“Veglat muzikore i kam nisur në moshën 20-vjeçare”, tha ai.

Ky pasion e nxiti të hapte këtë punishte ku prodhon 5 lloje instrumentesh të madhësive të ndryshme.

Gjelosh Alia na thotë se ky nuk është një biznes fitimprurës. Kur në derën e punishtes se tij nuk troket askush, Gjeloshi e shfrytëzon kohë për t’i rënë çiftelisë apo lahutës.

Atij i vjen keq që lahuta, me të cilën çdo malësor ka kënduar ‘Eposin e Kreshnikeve’, sot blihet vetëm si relike.

I vjen keq që të rinjtë nuk kanë dëshirë t’i njohin këto vegla muzikore e aq më pak të luajnë në to. Keqardhje që e shpreh edhe për djalin e tij.

Prej dëshirës që ka që tradita në muzikë t’i trashëgohet brezave që vijnë si pjesë e identitetit tonë kombëtar, ai prodhon edhe çifteli të këtyre përmasave.

LEXONI GJITHASHTU:

• Krijimet e artistit të ri shqiptar që shkojnë përtej zhanerit klasik
• Mungesa e teatrove privatë, Andi Tepelena: Duhet të ekzistojnë, konkurrenca rrit cilësinë
• Krijimet e artistit të ri shqiptar që shkojnë përtej zhanerit klasik