Meta: Pakoja e Madhe e ndihmës ekonomike një paketë qesharake

Kryetari i Partisë së Lirisë Ilir Meta sulmoi “Pakon e Madhe” të ndihmës ekonomike që maxhoranca ka planifikuar për përballimin e inflacionit të shkatuar nga lufta.

Gjatë një konference për shtyp këtë të premte, Meta, e cilësoi “Pakon e Madhe” si një pilulë elektorale që nuk ka asnjë impakt në zbutjen e krizës.

Ai shtoi se paketa është qesharake në raport me ndihmat që qeveria i ka dhënë klientëve të saj.

“Qeveria vendosi të ndajë 8 miliardë lekë ose më pak se 80 milionë dollarë për pensionistët dhe familjet në nevojë, edhe pse si pasojë e inflacionit të lartë, në 11 muaj arkëtoi 520 milionë USD.

Ndërkohë që Rama trumbeton me të madhe “Pakon e Madhe” me 80 milion euro, sipas raportit të KLSH shpërdorimi dhe grabitja e taksave të shqiptarëve, kalon shifrën 1 miliardë euro, vetëm për periudhën janar-nëntor 2022. Shitjet, qiratë dhe koncesionet janë të parat sa i përket dëmit më të madh që i kanë shkaktuar Buxhetit të Shtetit.

1 miliard euro abuzime, fonde të mjaftueshme për t’u përdorur për mijëra familje që vuajnë rritjen e çmimeve të ushqimeve, për ndërtimin e shkollave dhe dhënien fund të mësimit me turne, për rritjen e pagave të pedagogëve, ndihmë për studentët etj”, tha Meta.

Gjithashtu ai shtoi: Jemi të parë në kontinent për nivelin e varfërisë dhe pamundësisë që kanë dy të tretat për të përballuar jetëesën bazike.

Të dhënat e fundit të INSTAT japin një fryrje alarmante të administratës shtetërore e cila nga viti 2014 është fryrë me 22 mijë punonjës.

LEXO GJITHASHTU:

• FOTO/ Ilir Meta vizitë në selinë e Partisë Demokratike
• Pas vizitës në Presidencë, Rama takim me krerët e institucioneve në varësi