Meta thirrje policisë dhe Prokurorisë për zbardhjen e ngjarjeve kriminale

Presidenti Ilir Meta ka reaguar për ngjarjet e fundit kriminale në Shqipëri, për të cilat është shprehur se i dënon me forcë.

“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës”, shkruan presidenti në një postim në Facebook.

Sipas kreu te shtetit “këto ngjarje, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit”.

Meta i bën thirrje Policisë së Shtetit, Prokurorisë, Shërbimit Informativ të Shtetit, si dhe të gjithë institucioneve të tjera ligjzbatuese në vend, të forcojnë bashkëpunimin për arrestimin e menjëhershëm të autorëve me rrezikshmëri të lartë dhe vënien e tyre para drejtësisë.

Ai thekson se duhet të merren të gjitha masat efektive për të parandaluar ngjarje të tilla të rënda dhe tronditëse kriminale.

LEXONI GJITHASHTU:

• Torturohet biznesmeni, 10 persona të armatosur i grabisin 100 mijë euro
• Vritet me armë zjarri biznesmeni në Fier