Meteorologu tregon motin për fundjavën dhe çfarë na pret gjatë marsit

Gjatë një lidhje live për Euronews me Alba Xhanin, meteorologu Hakil Osmani foli për motin në fundjavë dhe muajin mars. Ai njoftoi se kjo fundjavë do të karakterizohet kryesisht nga mot i qëndrueshëm dhe intervale të gjata me diell, me përjashtim të disa momenteve të pakta me reshje shiu që priten gjatë pasdites në pjesën lindore të vendit.

“Dita e diel do të sjellë temperatura minimale në zonat malore rreth -1 deri -2°C, ndërsa maksimumet në këto zona pritet të jenë rreth 12°C. Në vijën bregdetare, temperaturat do të luhaten nga 8 deri në 13°C në mëngjes dhe 16-17°C në mesditë,” tha Osmani, duke theksuar se moti i qëndrueshëm do të mbizotërojë edhe gjatë javës që vjen.

Për muajin mars, Osmani paralajmëroi një rritje graduale të temperaturave, duke e konsideruar këtë periudhë si një kalim nga dimri drejt pranverës. Ai theksoi se, megjithatë, ekziston mundësia e rikthimit të masave ajrore të ftohta dhe reshjeve, sidomos në zonat malore.

“Në mars reshjet janë më se prezente herë pas here, dhe rritja e temperaturave mund të ndikojë edhe në zhvillime të përkohshme të cikloneve që prekin territorin shqiptar,” shtoi meteorologu. Ai përfundoi duke theksuar se prania e diellit dhe temperaturat më të larta në vijën bregdetare do të jenë karakteristike për ditët e ardhshme.