2 vite e 19 ditë i janë dashur Milanit për të mposhtur rivalët e përbetuar të qytetit, Interin, në derbin e Madoninës. Mbrëmja e së dielës në kampionatin italian zhvilloi përballjen historike të Milanos, aty ku djajtë dhe zikaltrit matën forcat, në një duel që gjithmonë di se si ti mbajë në ankth tifozët, e madje të luajë me zemrat e këtyre të fundit.

Përballja e parë sezonale i takoi Milanit të Fonsecas, i cili arriti të zhbllokonte shpejt shifrat me një gol tepër të bukur të Pulisic, në minutën e 10. Avantazhi nuk do të zgjaste shumë, pasi Di Marco riktheu ekuilibrat brenda fraksionit të parë, duke bërë që në pushimin mes pjesëve të mos kishte fitues. Pjesa e dytë tregoi më tepër dëshirë nga Milani, që u duk jo favorit në nisje të kësaj përballje, por ashtu sic derbit janë, nuk mund të parashikohen.

Kur u duk se skuadrat do të ndanin pikët, ishte mbrojtësi Gabbia që pas një topi të dërguar në zonë, goditi saktë me kokë duke mposhtur Sommer, e kthyer në hero të klasikes evropiane të futbollit. Fitorja e dytë sezonale në Serinë A për Milanin, që numëron 8 pikë po aq sa Interi. Të dielën në Itali u luajtën dhe 3 ndeshje të tjera interesante, ku fituan Roma, Fiorentina dhe Bologna.

LEXONI GJITHASHTU:

• Drejtuesit të pakënaqur me rezultatet, Roma shkarkon trajnerin De Rossi
• Gjermanët shkëlqyen në Champions: 18 gola në 3 ditë, Bayerni vendos rekord në Europë