Ministri i Drejtësisë: Do të mbyllen burgjet e trashëguara nga komunizmi

Ministri i Drejtësisë, Ulsi Manja, ka njoftuar se do të mbyllen burgjet e trashëguara nga periudha e komunizmit, duke u shprehur se ato janë struktura të amortizuara dhe që kërkojnë një kosto të lartë për mirëmbajtje.

Në një deklaratë të bërë gjatë Komisionit të Ligjeve, Manja sqaroi se, sipas një masterplani, do të mbyllen burgjet e Tepelenës, Burrelit dhe burgu 302 te Mine Peza, në Tiranë.

Ministri theksoi se ky proces ka për qëllim përmirësimin e kushteve të jetesës dhe punës për të burgosurit, si dhe për të siguruar një sistem më efikas.

“Kemi nisur mbylljen e institucioneve të vuajtjes së dënimit të trashëguara nga regjimi komunist, dhe kjo do të vazhdojë deri në mbylljen e të gjitha burgjeve të vjetra. Ato janë të amortizuara dhe na kushtojnë shumë për mirëmbajtje. Nuk do të hapim institucione të reja, por do të modernizojmë dhe transformojmë strukturat ekzistuese, si për shembull, burgun e Kukësit, i cili do të shërbejë për zonën dhe gjithashtu do të mbështesë edhe Kosovën”, tha Manja.

Në lidhje me të miturit, Manja njoftoi se do të ndërtohet një institut i ri dhe modern për të miturit, i cili do të hapet pas mbylljes së institucionit aktual në Kavajë.