Ministri i Jashtëm spanjoll vizitë në Tiranë, Xhaçka: Ja për çfarë ramë dakord

Ministrja Xhaçka priti këtë të premte në një takim zyrtar në Tiranë homologun spanjoll, Jose Manuel Albares Bueno.

Në konferencën e përbashkët për shtyp Xhaçka theksoi se vizita e ministrit të Jashtëm spanjoll vjen në prag të marrjes së Presidencës së BE nga Spanja dhe është tregues i mbështetjes që ky shtet ka për Shqipërinë dhe rajonin.

Gjithashtu ministrja e Jashtme bëri me dije se në takim u nënshkrua një Memorandum bashkëpunimi mes dy vendeve.

“Vizita i paraprin marrjes së Presidencës së BE nga Spanja në gjysmën e dytë të vitit. Kjo vizitë është provë e vëmendjes së posaçme që Spanja po i kushton vendit tonë dhe rajonit.

Ministri Albares na prezantoi linjat kryesore të Presidencës spanjolle. Ndajmë të njëjtin mendim, që zgjerimi nuk është thjesht një instrument i BE, por është vetë esenca e Unionit.

E informova homologun Albares mbi ecurinë e progresit të Shqipërisë në procesin e integrimit. Deri në fund të 2023, Shqipëria parashikon të përfundojë procesin e screening për të gjithë grup-kapitujt e negocimit. Kërkova mbështetjen e Spanjës në lehtësimin e diskutimeve në Këshill, për një vendim pozitiv për hapjen e grupit të kapitujve themelorë.

Ramë dakord për nënshkrimin e një Memorandum Bashkëpunimi mes vendeve tona.Synimi, arritja e një koordinimi sa më të mirë të punës për çështjet e integrimit evropian. Në këtë memorandum parashikohet që Spanja, të na mbështesë duke ofruar shërbime konsulence dhe asistencë teknike. Në fokus të diskutimeve ishte edhe dimensioni mesdhetar i politikave tona të jashtme

Shqipëria mirëpret prioritetet e politikës së jashtme të Spanjës në këtë rajon, në kuadër të Presidencës të Këshillit. Mirëpresim faktin që në vitet e fundit politika e jashtme spanjolle është orientuar edhe drejt Mesdheut Lindor, përfshirë BP. Forcimi i bashkëpunimit BE-BP është bërë më i rëndësishëm se kurrë si pasojë e agresionit të paligjshëm rus ndaj Ukrainës”, tha Xhaçka.

LEXO GJITHASHTU:

• Çështja e kufirit detar, Dendias: Brenda vitit 2023 do të kemi zhvillime
• “Lufta e Kosovës s’mund të rishkruhet”, Xhaçka: Do rrëzojmë raportin e Dick Marty