Ministri Yassin: Libani në prag të ‘katastrofës’ me një milion të zhvendosur

Ministri i Menaxhimit të Fatkeqësive Emergjente në Liban, Nasser Yassin, ka thënë se në pak orë, numri i njerëzve të zhvendosur në Liban u rrit nga 300,000 në pothuajse një milion.

Sipas mediave të huaja, ai i tha korrespondentit special të Sky News, Alex Crawford, se pavarësisht hapjes së qindra strehimoreve, Libani është “në një moment shumë kritik”.

“Ne jemi në prag që të arrijmë në një situatë katastrofike humanitare”, tha ai mes të tjerave.

Sipas tij, Libani ka një popullsi prej tre deri në katër milionë libanezë, 1.5 milionë refugjatë sirianë dhe 250,000 refugjatë palestinezë.

“Ne e kemi marrë këtë mbi supet tona dhe tani kemi një barrë shtesë prej një milion libanezë të zhvendosur ose të prekur nga agresioni aktual”, shtoi ai.

Ai tha se metoda e Izraelit për të postuar në rrjetin social ‘X’ përpara se të kryente sulme përfaqëson “profesionalizimin e gjenocidit”.

Kujtojmë se nga ana tjetër Izraeli thotë se po synon militantët e Hezbollahut që kryejnë sulme me raketa kundër veriut të territorit të tij që kanë zhvendosur banorët izraelitë.

LEXONI GJITHASHTU:

• Erdogan bën thirrje për veprim të OKB-së për të ndaluar sulmet izraelite në Liban
• Izraeli vijon sulmet në Liban, humbin jetën 9 persona nga një familje