Ministrja e Financave: Nga 1 prilli paga minimale do të jetë 40 mijë lekë

Ministrja e Ekonomisë dhe Financave Delina Ibrahimaj deklaroi këtë të mërkurë se duke filluar nga data 1 prill, paga minimale në Republikën e Shqipërisë do të jetë 40 mijë lekë të reja.

Gjatë një deklarate për media në përfundim të mbledhjes së qeverisë, Ibrahimaj tha se të gjitha bizneset private, por edhe sektori publik, do të jetë i detyruar të respektojë pagën e re minimale të caktuar nga qeveria.

Sipas saj kjo rritje është në nivelin 17.6% në raport me pagën prej 34 mijë lekësh që ka qenë në treg.

“Sot u morr vendimi në Këshillin e Ministrave për përcaktimin e pagës minimale. Në bazë të vendimit paga minimale shkon nga një nivel në 34 mijë lekë që është aktualisht, në nivelin 40 mijë lekë. Gjatë vitit të kaluar ka patur një rritje të pagave, ku gjatë 9 mujorit të vitit 2022 pagat mesatare në sektorin privat janë ritur 12.3%. Rritja që u miratua është prej 6 mijë lekësh bruto, dhe është në nivel 17.6% më e lartë se paga që është në treg. Kjo pagë do t’i atribuohet si sektorit privat dhe atij publik.  Çdo punëmarrrës dhe punëdhënës do të jetë i detyruar të zbatojë vendimin e pagës minimale që nga data 1 prill. Në pagën që marrin në muajin maj do të jetë e reflektuar kjo rritje”.

LEXONI GJITHASHTU

• Rama prezanton ndihmën ekonomike për personat me aftësi të kufizuara
• Rriten pagat dhe kosto e jetesës, shpenzimet në familje nga 72-99 mijë lekë