Mister mbi trupin e dekompozuar të gjetur në Kolonjë, për çfarë dyshohet

Detaje të reja janë zbardhur në lidhje me një kufomë të dekompozuar, e cila është gjetur ditën e hënë në fshatin Shtikë të Kolonjës.

Kufoma është konstatuar nga një banor i zonës, i cili po korrte grurin me autokombajnë, teksa ka parë viktimën dhe ka lajmëruar menjëherë forcat e policisë.

Nga burime policore thuhet se trupi i viktimës do të dërgohet në morgun e Tiranës, ku dhe do të kryhet ekspertiza mjeko-ligjore për përcaktimin e saktë të shkaqeve të vdekjes.

Ky person nuk është identifikuar, ndërsa do t’i merren edhe mostra për analizën e ADN-së, si dhe do të kryhet ekspertiza antropologjike për të përcaktuar dhe kohën e vdekjes.

Ndërkohë, dyshohet se personi mund të ketë ndërruar jetë rreth 6 muaj më parë.

Paraprakisht është parë se kufoma nuk ka dëmtime të jashtme, duke përjashtuar pistën e një krimi, ndërsa mendohet se mund të ketë ndërruar jetë nga shkaqe natyrale.

Ajo çfarë ka bërë më shumë përshtypje është se në polici nuk ka pasur asnjë denoncim për persona të zhdukur, duke mos treguar asnjë interesim për personin në fjalë.

LEXONI GJITHASHTU:

• Gjendet trupi i dekompozuar i një njeriu në fshatin Shtikë të Kolonjës
• Apel për kujdes, trashëgimia kulturore në Gjirokastër nën kërcënimin e zjarreve