Mitsotakis riformaton qeverinë, Demokracia e Re nuk arriti objektivat në zgjedhje

Kryeministri grek Kyriakos Mitsotakis ka vendosur të riformatojë qeverinë e tij konservatore, pas rezultatit në zgjedhjet euro-parlamentare, ku partia Demokracia e Re u konfirmua si forca e parë politike, por nuk arriti objektivin e paracaktuar prej 33 për qind të konsensusit, ose rezultatin e zgjedhjeve të mëparshme të 2019-ës.

Për më tepër, konservatorët siguruan të dielën e kaluar 28 për qind të mbështetjes, shumë më poshtë se kuota prej 40 për qind e siguruar një vit më parë në zgjedhjet kombëtare.

Sikurse ka bërë të ditur zëdhënësi i qeverisë, Pavlos Marinakis, ndryshimet kanë prekur Ministrinë e Zhvillimit dhe atë të Punës, ku janë caktuar dy drejtues të rinj.

Vullneti për të bërë ndryshime në këto dy dikastere është motivuar nga fakti se rritja e kostos së jetesës është një nga shqetësimet kryesore që ka kushtëzuar votën e grekëve dhe ka penalizuar qeverinë në votime.

Mitsotakis ka mbajtur ndërkohë të pandryshuar ministrin e Financave, ndërsa ka caktuar elementë të rinjë në Ministrinë e Agrikulturës, atë të Azilit dhe Emigracionit dhe atë të Brendshme.

“Është detyra ime të deshifroj mesazhin e votuesve grekë dhe të marrë masat e duhura”, ka deklaruar Mitsotakis, i cituar nga mediat helene.