Mjegulla ndikon në shëndet, mjekja: Ja si duhet të kenë kujdes pacientët me astma

Korça po përjeton ditët e fundit ulje të temperaturave, të shoqëruara me prezencën e mjegullës, kryesisht në orët e para të mëngjesit. Kjo situatë sjell probleme të ndjeshme tek ata persona të cilët vuajnë nga sëmundje të mushkërive, thotë doktoresha pneumologe, Diana Alickolli.

“Kjo është klimë e disfavorshme për pacientët kronikë, specifike për specialitetin tonë, e rrezikshme edhe për sëmundjet e tjera por për diagnozat e mushkërisë është një nga disfavoret klinike me marrje frymë dhe infeksione të përsëritura”, tha pneumologjia.

Mjekja e njohur këshillon se personat të cilët vuajnë nga këto sëmundje nuk duhet të dalin as në mbrëmje për shkak të tymit në Korçë, ndërsa të evitojnë edhe grumbullimet e njerëzve.

“Pacientët në orët e mëngjesit duhet të mos dalin dhe në darkë, kemi atë tymin e famshëm në Korçë që nisi me ftohjen e kohës. Në këtë moment kemi disa raste me temperaturë me virozë, duhet të kenë kujdes nga vendet e grumbullimit të njerëzve, evente dhe duke patur këtë nuk do kemi shtrime por të sëmurët akute që fillojnë nga Janari, për pneumoni”, shtoi Diana Alickolli.

Numri i personave të shtruar në sanatoriumin e Korçës është i qëndrueshëm, ndërsa shihet një rritje e numrit të personave me virozën e stinës.