Mjeku Hasi në arrest për abuzim seksual/ KMSH: Akte të ulëta, strukur pas besimit

Komuniteti Mysliman i Shqipërisë ka reaguar me anë të një postimi në faqen zyrtare në Facebook,lidhur me rastin e Dervish Hasit, i cili në kundërshtim me ligjin ka  kryer poligami dhe marrëdhënie seksuale me të mitur.

Dervish Hasi pretendonte se ishte mysliman, ai ishte i martuar me tre gra ndërsa prejdy vitesh konsideronte gruan e tij edhe një vajzë të mitur, tashmë e moshës 16-vjeçare.

Komuniteti mysliman shkruan në reagim se e gjen të pavend interesimin e lartë për një çështje që nuk i përket KMSh-së, por organeve ligjzbatuese të shtetit shqiptar. Gjithashtu KMSH ka deklaruar se si çdo fe tjetër, nuk mban regjistër me të dhëna psikologjike apo devijime të natyrave të ndryshme të njerëzve, qofshin frekuentues ose jo të objekteve tona të kultit.

Ndërsa thekson  se komuniteti distancohet nga  çdo individ apo grup që keqpërdor fenë për qëllime të ulëta.

Postimi i plotë i Komunitetit Mysliman:

Në përgjigje të pyetjeve të shumta nga mediat për rastin e arrestimit të një mjeku të dyshuar për abuzim dhe vepra të tjera sqarojmë sa më poshtë vijon:

Komuniteti Mysliman i Shqipërisë është një institucion fetar, i cili ushtron aktivitetin e tij në përputhje me Kushtetutën dhe ligjet në fuqi të Republikës së Shqipërisë.

Është institucion që merret me jetën fetare dhe përçimin e mesazhit të qartë e të pastër islam në vendin tonë, gjë të cilën prej një shekulli e ushtron në përputhje me parimet më të larta fetare dhe konform ligjeve të Republikës së Shqipërisë.

Ne e gjejmë të pavend interesimin e lartë për një çështje që nuk i përket KMSh-së, por organeve ligjzbatuese të shtetit shqiptar.

Komuniteti Mysliman, ashtu si çdo fe tjetër, nuk mban regjistër me të dhëna psikologjike apo devijime të natyrave të ndryshme të njerëzve, qofshin frekuentues ose jo të objekteve tona të kultit.

Ne distancohemi nga çdo individ apo grup që keqpërdor fenë për qëllime të ulëta.

Lusim mediat dhe opinionin publik që të jenë korrekt dhe të kujdesshëm në citimet e tyre gjatë raportimit të ngjarjeve të ngjashme.

Një individ që është objekt për oganet ligjzbatuese nuk mund të jetë asgjë më shumë se kaq.

Ne distancohemi nga çdo individ që kryen akte të ulëta e të shëmtuara, aq më tepër duke u strukur pas besimit.

Islami është fe e paqes, moralit të lartë dhe drejtësisë!

LEXONI GJITHASHTU:

• “Haremi” i kirurgut/ Teologu: Poligamia e jashtëligjshme, çfarë thuhet në islam
• “Erdhi me dëshirë”- Zbardhet dëshmia e kirurgut në Tiranë që abuzoi me 16-vjeçaren