Molliqaj-Bushatit: Po mësojmë nga Vuçiç të vërtetat që Kurti s’i thotë

Kryetari i PSD-së Dardan Molliqaj ka replikuar me analistin Andi Bushati në studion e “Now me Erla Mëhillin” sa i takon tensioneve në veri të Kosovës.

Molliqaj thotë se nëse dikush argumenton se është marrëveshje më e mirë të bësh asosacionin e komunave me shumicë serbe dhe të gjitha komunave të tjera ndërsa Serbia mos ta njohë Kosovën, dhe është marrëveshje më e keqe që të ketë ripërcaktim të kufirit kur Serbia njeh Kosovën ka ose dallime të mëdha në vlera ose moskuptime të realitetit.

Sipas tij është jetike që një dialog i tillë që është kaq i mbyllur të kritikohet.

“Vuçiçi po mbron interesat e tij dhe ky le të mbrojë interesat e Kosovës. Unë s’po them të vijë të na pyesë për çdo gjë, thjesht është e papranueshme që më shumë të marrim vesh nga Vuçiç sesa nga Albin Kurti,” – tha Molliqaj.

Ndërkohë, Bushati nuk ra dakord kur thuhet se një marrëveshje në bazë të një plani franko- gjerman pa njohje reciproke është e keqe.

“Unë po ju ngre një alternativë tjetër. Nëse kjo marrëveshje, termat e të cilës ne nuk i dimë dot, nuk ka njohje të ndërsjellë, por Kosovën e kemi me ulëse në OKB, në disa organizata ndërkombëtare, Kosova njihet nga ato shtete të BE-së që nuk e njohin a duhej një qeveri t’i thoshte po një marrëveshje të tillë. Pra, qasja që çdo lloj gjëje tjetër që nuk përfundon me njohjen e Serbisë, nuk duhet firmosur më duket pak e ekzagjeruar,” – u shpreh analisti.

LEXONI GJITHASHTU:

• Lindita Nikolla për situatën në Kosovë: Dëgjoni ndërkombëtarët
• Çfarë po ndodh në veri të Kosovës?
• Situata në Kosovë, Rama: Dialog i palodhur me Serbinë për të mos humbur edhe aleatët