Monza i shkakton disfatë Milanit, kuqezinjtë pësojnë 4 gola

Milani ka humbur mundësinë më të mirë për të parakaluar Juventusin në tabelën e klasifikimit në kampionatin italian, me kuqezinjtë të cilët u mposhtën në shifrat 4-2 nga Monza. Përballja e luajtur në transfertë pa një Milan me shumë ndryshime në formacion, me Piolin që u dha kohë lojtarëve të qetësohen pas asaj performance të shkëlqyer ndaj Rennes në Europa League.

Gabimet e mbrojtjes kuqezi ishin të shumta, teksa nga një i tillë do të vinte goli i parë. Pessina shënoi nga pika e bardhë e penalltisë, ndërsa po brenda fraksionit të parë, Dany Mota dyfishoi avantazhin në 2-0. Rikthimi i disa prej titullarëve në fushë në fraksionin e dytë tek Milan ndikoi menjëherë, me Giroud që ngushtoi diferencën dhe Pulisiç që riktheu ekuilibrat. Kur u duk se Milani mund të regjistronte përmbysjen e madhe, Colombo e Bondo shënuan sërish për Monzën, duke vulosur fitoren 4-2. Kuqezinjtë humbasin kështu mundësinë për tu ngjitur të dytët.

Më herët ishte Roma që mori një tjetër fitore nën drejtimin e De Rossit. Kundërshtari i radhës ishte Frosinone, ndërsa kryeqytetasit arritën të shënojnë 3 gola në transfertë. Hujisen zhbllokoi rezultatin, ndërsa në pjesën e dytë Azmoun e Paredes dërguan shifrat në 3-0. Edhe Bologna mori një 3 pikësh me shumë vlerë ndaj Lazios në transfertë duke u ngjitur përkohësisht në vendin e pestë. Vendësit kaluan të parët në avantazh me Isaaksen, por Azzouzzi dhe Zirkzee përmbysën gjithcka duke zhvendosur fitoren drejt Bolognas në të 4-tin triumf radhazi. Dy përballjet e tjera Empoli-Fiorentina dhe Udinese-Cagliari u mbyllën në barazim.

LEXONI GJITHASHTU:

• Shkëputet Leverkuseni në krye, Bayerni “dorëzohet” ndaj Bochum
• Shqipëria fiton medalje ari në Kampionatin Europian, Dudaev shpallet kampion