Mori 50 mijë lekë nga një shtetas, Gjykata e Tiranës lë në burg oficerin Palushi

Gjykata e Tiranës ka vendosur burg me afat 15 ditë për oficerin e Policisë Gjyqësore Kastriot Palushi, i vënë në pranga pak ditë më parë nga AMP.

Palushi u arrestua në flagrancë nën dyshimin për “Shpërdorim detyre” dhe “Korrupsion pasiv”.

Nënkomisari Kastriot Palushi, 35 vjeç, ka qenë me detyrë Specialist për Hetimin e Krimeve në Komisariatin e Policisë Nr. 4 Tiranë.

Ai dyshohet se ka marrë shumën prej 50 mijë lekësh nga një shtetas, me qëllim shmangien e tij nga përgjegjësia penale.

“Arrestimi i tij u bë i mundur pasi nga hetimi i kryer, u administruan prova dhe fakte që ky punonjës policie, duke shfrytëzuar funksionin organik dhe atributet e policisë gjyqësore, ka kërkuar dhe marrë shumën monetare prej 50.000 lekësh, duke premtuar shmangien nga përgjegjësia penale ndaj një shtetasi, i cili disa ditë më parë ishte kallëzuar nga një tjetër shtetas për kanosje. Në përfundim të veprimeve, u sekuestruan në cilësinë e provës materiale shuma prej 50 mijë lekësh, një automjet Hyundai, një aparat celular dhe dokumente të tjera që lidhen me ngjarjen”, bëri me dije policia.

Hetimet vijojnë për dokumentimin e plotë me prova ligjore, si dhe identifikimin e punonjësve të tjerë të mundshëm të përfshirë në këtë ngjarje.

Njoftimi i Gjykatës:

Vleftësimin si të ligjshëm të arrestimit në flagrancë të shtetasit K. P., kryer nga oficerët e policisë giyqësore me iniciativë në datë 23.06.2024 ora 21,00.

2. Caktimin e masës së sigurimit ndaj shtetasit K. P., i dyshuar për kryerjen e veprave penale “Shpërdorim detyre” dhe “Korrupsioni pasiv ¡ personave qe ushtrojnë funksione publike”, parashikuar nga nenet 248 dhe 259/1 të Kodit Penal, atë të-Arrest ne burg, me afat 15 dite, parashikuar nga neni 238 i K.Pr. Penale.
3. Ngarkohet policia giyqësore për zbatimin e këtij vendimi.
4. Kundër këtij vendimi lejohet te behet ankim ne Gjykatën e Apelit te Juridiksionit të Përgjithshëm Tiranë, brenda 5 (pesë) ditëve, afat ky qe fillon nga e nesërmja e njoftimit te ketij vendimi.
5. U shpall sot ne Tirane me date 26.06.2024.

LEXONI GJITHASHTU:

• EMRI| Mori 50 mijë lekë ryshfet, arrestohet oficeri i krimeve në Tiranë
• U arrestua nga AMP, përjashtohet nga Policia e Shtetit oficeri i krimeve në Tiranë