Mos udhëtoni më shpejt se jeta! Apeli i Policisë Rrugore për drejtuesit e mjeteve

Policia rrugore u ka bërë apel drejtuesve të mjeteve të tregohen të kujdesshëm në rrugë gjatë ditëve të festave, duke zbatuar rregullat e qarkullimit e duke shmangur përdorimin e celularit dhe pijeve alkoolike.

“Shërbimet e Policisë Rrugore, përgjatë 2 ditëve të para të vitit të ri 2023, kanë intensifikuar monitorimet në akset rrugore dhe në qendrat urbane, me qëllim parandalimin e aksidenteve rrugore. Në të gjitha akset rrugore, 11 makina inteligjente, 16 radarë automatikë, si dhe dhjetëra patrulla me mjete të paloguara, janë duke monitoruar qarkullimin. Njëkohësisht, vijon monitorimi me përzgjedhje edhe për parandalimin e drejtimit të automjeteve, nën efektin e alkoolit apo në gjendje të dehur”, thuhet në një njoftim të policisë.

Policia Rrugore apelon për të gjithë drejtuesit e mjeteve që të zbatojnë me rigorozitet rregullat e qarkullimit rrugor, të shmangin përdorimin e celularit gjatë drejtimit të automjetit, të shmangin pijet alkoolike kur u duhet të drejtojnë mjetin, të moderojnë shpejtësinë, të vendosin rripin e sigurimit, drejtuesit e motomjeteve të vendosin kaskën mbrojtëse, të mos kryejnë parakalime të gabuara dhe në çdo rast, t’i japin përparësi këmbësorëve.

LEXONI GJITHASHTU:

• Zjarri në Tregun Industrial në Durrës, policia jep detajet e para
• “Dëme dhe në banesë”- Policia reagon për shpërthimin e makinës së efektivit