Moti i keq në Durrës, pezullime dhe shtyrje të lundrimeve, era dëmton shëtitoren

Moti i keq që ka përfshirë gjirin e Durrësit që nga dita e hënë ka sjellë jo pak problematika. Kompanitë e lundrimit kanë njoftuar shtyrje dhe pezullime të lundrimeve nga porti i Durrësit drejt brigjeve italiane dhe anasjelltas.

Pasi u pezulluan mbrëmjen e së martës, vetëm 2 tragete kanë rinisur lundrimet këtë të mërkurë.

Planifikuar për t’u nisur nga Durrësi në orën 8:00 të mëngjesit, “Rigel VII” ka mundur të niset por me disa orë vonesë.

Ndërkaq, trageti “Rigel III” është nisur rreth orës 3:00 të mëngjesit nga porti i Barit dhe është ankoruar në kalatën e portit të Durrësit në mesditë.

Nisja nga Ankona me tragetin “AF CLAUDIA” është shtyrë me dy ditë, pas parashikimit për t’u nisur më datë 19, ndërsa “AF MARINA” pritet të niset mbrëmjen e kësaj të mërkure.

Problematikat nuk kanë munguar as në qytet.

Shëtitores “Taulantia” i është rikthyer panorama e përhershme, sa herë qyteti përfshihet nga stuhitë.

Dallgët e detit kanë arritur lartësinë 1.8 – 3 m këto ditë, ndërsa shpejtësia e erës që nga e hëna arrin deri në 25 m/s.

LEXONI GJITHASHTU:

• Moti i keq në vend, shtyhet lundrimi i tragetit të linjës Durrës-Bari
• FOTO | Moti i keq në Shkodër, rrëshqitje dherash dhe gurësh në rrugën e Prekalit