Moti i keq në vend, ja si paraqitet situata deri tani sipas raportimeve zyrtare

Situata në akset rrugore të vendit paraqitet problematike për shkak të reshjeve të dendura të dëborës dhe shirave intensive.

Sipas raportimeve nga strukturat e sistemit të Mbrojtjes Civile në Qendrën Kombëtare Operacionale të Emergjencave Civile, situata deri në këto momente paraqitet e tillë:

Në qarkun Dibër, rruga e “Arbrit” është e pakalueshme, ndërsa në bashkitë Dibër, Bulqizë, Klos dhe Mat disa qendra administrative dhe rrugë dytësore janë të bllokuara. Problem mbeten edhe aksit Peshkopi-Ulëz, Kir-Shosh dhe rrugët rurale në Fushë-Arrëz, të cilat janë të bllokuara nga dëbora dhe rrëshqitjet e dheut.

Në aksin Elbasan-Qafë Thanë ka prani inertesh dhe dëbore, duke vështirësuar lëvizjen e mjeteve të rënda. Ndërkohë, në bashkinë Krujë dhe në rrugën për në Shëngjergj të Tiranës, qarkullimi është i vështirë për shkak të borës së madhe.

Në qytetin e Vlorës, shirat e dendur kanë shkaktuar përmbytje, duke e bërë të vështirë lëvizjen e mjeteve në rrugët e qytetit.

Gjatë ditës së sotme po punohet me borëpastrueset për të mbajtur të hapura rrugët e qarkullueshme dhe për të hapur rrugët e bllokuara nga dëbora.
Rekomandohen përdoruesit e rrugës te lëvizin me shpejtësi të kufizuar, të respektojnë sinjalistikën rrugore dhe në akset me dëbore të përdorin gomat dimërore.

LEXONI GJITHASHTU:

• Reshje bore dhe temperatura të ulëta, si paraqitet situata e motit në qarkun Shkodër
• Aksident në autostradën Vlorë-Fier, dy të plagosur