Mungesa e financimeve shkakton korrupsion në shëndetësi, thotë deputetja

Keq-financimi në sistemin shëndetësor është një nga arsyet e korrupsionit në shëndetësi. Kështu deklaroi për emisionin “Mirëmëngjes” në  Euronews Albania deputetja e PD-së Zheni Gjergji.

Anëtarja e Komisionit të Shëndetësisë nënvizoi se nxitimi për të mbaruar punë shpejt është një tjetër faktor që nxit korrupsionin tek bluzat e bardha.

“Korrupsioni është një fenomen në fushën e kujdesit shëndetësor, por edhe në fusha të tjera është një fenomen i rëndë dhe mjaft i përhapur”, nënvizoi ajo, ku shtoi se nuk duhet të sulmohen mjekët, pasi ata janë heronjtë e ditës.

Deputetja tha se edhe politikanët janë nën presione të vazhdueshme për korrupsion.

“Edhe politikanët janë njerëz dhe mund të hyjnë shumë elementë për t’i korruptuar ata.  Politikanët e rinj do vazhdojnë përpara për ta denoncuar korrupsionin në të gjitha nivelet”, u shpreh ajo.

Ndërsa, ish-zv.ministrja e Drejtësisë Brikena Kasmi deklaroi se besimi tek drejtësia apo organet e drejtësisë në Shqipëri është shteruar për shkak të korrupsionit.

Sipas saj, kjo trondit edhe klimën e biznesit dhe zhvillimin e vendit, ku kohët e fundit është vënë re edhe një ikje e të rinjve.