Mungon orientimi për jetesë të pavarur të personave me aftësi ndryshe, thotë specialisti

Personat me aftësi ndryshe nuk kanë orientimin e duhur për një jetesë të pavarur.

Ky ishte konstatimi i Darian Konomit, specialist pranë Komisionerit kundër Diskriminimit i cili sqaroi se pavarësisht se vetë ai ecën ndryshe, kjo nuk do të thotë që nuk është i aftë për punë.

Sipas Konomit, këta persona varen nga familjarët dhe miqtë, ndërkohë që diçka e tillë është krejtësisht e gabuar sepse fokusi duhet të jetë te krijimi i kushteve, jo te varësia.

“Unë e di që ka vështirësi, por do bëja një thirrje që dhe vetë personat me aftësi të kufizuara të duan të dalin,” – tha specialisti.

Ka zero përpjekje për t’i bërë të pavarur këta persona sipas Eglantina Bajramit, drejtoreshë ekzekutive e klubit kombëtar të prindërve që kanë fëmijë me aftësi ndryshe.

Ajo tha se këshillimi i karrierës mungon për të gjithë të rinjtë shqiptar.

Konomi tregoi gjithashtu se edhe ato trotuare që janë të përshtatur për personat me aftësi ndryshe, nuk janë në standardet e duhura.

“Kur themi që një trotuar është i përshtatur do të thotë që çdo përdorues i karrigeve me rrota të mund të lëvizi i lirë në Tiranë vetëm dhe pa ndihmën e dikujt,” – u shpreh ai, ndërsa theksoi se përshtatshmëria dhe lëvizja e lirë janë të drejta themelore.

Sipas tij duhet një lobim i fortë i shoqatave që të përdorin institucionet që kanë në dorë përmirësimin e kushteve të jetës për personat me aftësi të kufizuara.

LEXONI GJITHASHTU:

• Trotuarët shkaktojnë vështirësi në lëvizje për personat me aftësi ndryshe