Musk mbështeti ekstremin e djathtë në Gjermani, reagon Scholz

Kancelari gjerman Olaf Scholz hodhi poshtë sot pretendimin e biznesmenit amerikan Elon Musk se vetëm partia e djathtë Alternativa për Gjermaninë (AfD) mund ta “shpëtojë Gjermaninë” dhe shtoi se liria e mendimit vlen edhe për multimiliarderët, raporton AP.

Miliarderi amerikan, i cili duhet t’i bashkohet administratës së presidentit të sapozgjedhur të SHBA-së, Donald Trump, ka hyrë sot në fushatën zgjedhore gjermane, duke e quajtur Alternativën e djathtë për Gjermaninë (AfD) shpëtimtarin e vendit, raporton Reuters.

“Vetëm AfD mund ta shpëtojë Gjermaninë”, shkroi Musk në platformën e tij X.

I pyetur për të komentuar deklaratën e Musk, Scholz tha se liria e fjalës vlen për multimiliarderët, por se liria e fjalës do të thotë gjithashtu se mund të thuash gjëra që janë të gabuara dhe nuk përmbajnë këshilla të mira politike.

“Unë them me vendosmëri se të gjitha partitë demokratike në Gjermani e shohin atë ndryshe”, shtoi ai.

AfD është e dyta në sondazhet e opinionit dhe mund të jetë në gjendje të pengojë një shumicë të qendrës së djathtë ose të qendrës së majtë, por partitë centriste të Gjermanisë janë zotuar të shmangin mbështetjen e AfD në nivel kombëtar.

Gjermanët do të shkojnë në kutitë e votimit më 23 shkurt pas rënies së qeverisë së koalicionit të qendrës së majtë të udhëhequr nga kancelari Olaf Scholz.

LEXONI GJITHASHTU:

• Scholzi humbet votëbesimin, hapet rruga për zgjedhje të reja në Gjermani
• Scholz kërkon votëbesim, Gjermania drejt zgjedhjeve të parakohshme