Nagelsmann rrëfen shkarkimin nga Bayern: Ndihesha i përhumbur

Gjermania ka nisur zyrtarisht përgatitjet për dy ndeshjet e radhës, me skuadrën e cila ka udhëtuar drejt SHBA-ve. Tashmë drejtimin e skuadrës e ka në dorë Julian Nagelsmann, i cili për herë të parë në karrierën e tij drejton një përfaqësuese, ndërsa më parë ka trajnuar ekipe si Leipzig, Bayern e Hoffenheim.

Në një konferencë për shtyp, 36-vjeçari ka folur për periudhën në të cilën drejtonte bavarezët, ku pas shkarkimit pësoi një shok psikologjik.

“Prej moshës 14-vjeçare nuk i jam ndarë futbollit në role të ndryshme. Pas largimit nga Mynihu nuk ishte e lehtë. Në thelb pushimet karakterizojnë periudhën e relaksimit dhe prezencën pranë personave që do, por rezultoi e kundërta. Shpeshherë mendoja tërheqjen përfundimtare nga futbolli, pavarësisht rolit. Ndihesha i përhumbur. Kurrë deri në këtë moshë nuk e kisha ndjerë veten kaq keq,” – tha ai.

Më tej tekniku ka folur dhe për skuadrën aktuale, e cila ka nevojë për shumë punë.

“Mezi po pres të debutoj në pankinën e Gjermanisë. Do të jetë tejet emocionuese që të jem timonier i përfaqësueses në kampionatin evropian, i cili do të zhvillohet në shtëpinë tonë. Jemi ambiciozë dhe me objektiva madhore, koha e duhur për t’i përveshur mëngët,” – u shpreh Nagelsmann.

Në muajin tetor Gjermania do të zhvillojë dy ndeshje, më 14 ndaj SHBA-së dhe 4 ditë më pas përballet me Meksikën.

LEXONI GJITHASHTU:

• Gjermania i beson Julian Nagelsmann ekipin kombëtar
• U shkarkua në mes të sezonit, Julian Nagelsmann do t’i kushtojë Bayernit 30 mln euro