Natyrë e paprekur dhe tradita lokale, pse turistët po zgjedhin Librazhdin

Mes maleve të gjelbëruara, pyjeve të Parkut Kombëtar Shebenik-Jabllanicë dhe peizazheve mahnitëse të Fushë-Studënit, Librazhdi po shndërrohet në një nga destinacionet më të preferuara të turizmit malor në Shqipëri.

Natyra e paprekur, ushqimet tradicionale dhe mikpritja e banorëve po tërheqin gjithnjë e më shumë vizitorë vendas dhe të huaj, duke e kthyer turizmin në një nga sektorët me zhvillimin më të shpejtë në këtë zonë.

Vizitorët vlerësojnë jo vetëm bukuritë natyrore, por edhe atmosferën e veçantë që ofron qyteti.

Një turist nga Podujeva shprehet se Librazhdi është një qytet i vogël, por me shumë vlera.

“Vijmë nga Podujeva. Librazhdi na pëlqen shumë. Është një qytet i vogël, por me zemër të madhe. Ka aktivitete, kulturë, njerëz të mirë dhe bujarë. Banorët janë mikpritës, ndërsa ambienti dhe natyra janë të shkëlqyera. Na pëlqen veçanërisht lumi Shkumbin, i cili i jep qytetit një bukuri të veçantë”, thotë ai.

Edhe turistë të tjerë vlerësojnë pasuritë natyrore dhe produktet tradicionale të zonës.

“Po e shijojmë shumë natyrën. Është një zonë turistike shumë e bukur, sidomos Fushë-Studëni. Ajo që na ka lënë më shumë përshtypje është ushqimi bio, por edhe gjithçka tjetër që ofron kjo zonë”, shprehet një vizitore.

Sipas kryetarit të Bashkisë Librazhd, Mariglen Disha, interesi për këtë destinacion po rritet nga viti në vit.

“Gjatë vitit të kaluar, Librazhdi është vizituar nga rreth 192 mijë turistë vendas dhe të huaj. Deri në fund të këtij viti presim që numri i vizitorëve të kalojë 300 mijë. Kjo vjen si rezultat i promovimit të vazhdueshëm të zonës dhe bashkëpunimit me institucionet e turizmit. Synimi ynë është ta kthejmë Librazhdin në një destinacion të rëndësishëm të turizmit malor”, deklaroi Disha.

Me pasuritë natyrore, traditat dhe kulturën lokale, Librazhdi po konsolidohet gjithnjë e më shumë si një nga destinacionet më tërheqëse të turizmit malor në Shqipëri.

Librazhdi tërheq gjithnjë e më shumë turistë, priten mbi 300 mijë vizitorë këtë vit pic.twitter.com/vdfPsOa7bs

— Euronews Albania (@EuronewsAlbania) June 6, 2026