Ndalet përkohësisht konflikti në jugun e Sirisë, grupet beduine largohen nga Suwayda

Qeveria e Sirisë njoftoi largimin e grupeve beduine nga qyteti i Suwayda-s, ndërsa forcat qeveritare u vendosën për të mbikëqyrur tërheqjen e tyre në të gjithë rajonin.

Ky zhvillim pasoi urdhrin e presidentit sirian, Ahmed al-Sharaa, për një armëpushim të ri midis grupeve beduine dhe druze, të cilin e arritën nëpërmjet një marrëveshjeje të ndërmjetësuar nga Shtetet e Bashkuara, me qëllim shmangien e sulmeve të mëtejshme ushtarake izraelite ndaj Sirisë.

Nour al-Din Baba, zëdhënës i Ministrisë së Brendshme Siriane, tha në një deklaratë të transmetuar nga agjencia zyrtare e lajmeve Sana në Siri, se luftimet përfunduan “pas përpjekjeve intensive” për të zbatuar marrëveshjen e armëpushimit dhe vendosjen e forcave qeveritare në zonat veriore dhe perëndimore të provincës Suwayda.

Ai theksoi se qyteti tani është “pastruar nga të gjithë luftëtarët fisnorë dhe përleshjet brenda lagjeve të qytetit janë ndalur”.

Deri tani, mbi 260 persona janë konfirmuar të vrarë dhe rreth 1,700 të plagosur, sipas Ministrisë së Shëndetësisë Siriane, ndërsa vlerësime të tjera flasin për mbi 900 të vrarë.

Ndërkaq, më shumë se 87,000 persona janë zhvendosur nga zonat e konfliktit.

Luftimet shpërthyen javën e kaluar pas rrëmbimit të një shoferi kamioni nga komuniteti Druze në një autostradë publike, ngjarje që shkaktoi një valë sulmesh hakmarrëse dhe përshkallëzoi konfliktet fisnore në rajonin e Suwaydas dhe në gjithë vendin.

Sekretari i Shtetit i SHBA-së, Marco Rubio, i bëri thirrje të shtunën qeverisë siriane të përdorë forcat e saj të sigurisë për të parandaluar “xhihadistët e dhunshëm” të hyjnë në Suwayda dhe “të kryejnë masakra”.

Madje, në një postim në platformën X, Sekretari i Shtetit amerikan, Marco Rubio, deklaroi se SHBA-të kanë qenë shumë të përfshira gjatë tre ditëve të fundit, duke bashkëpunuar ngushtë me Izraelin, Jordaninë dhe autoritetet në Damask për të adresuar zhvillimet në jugun e Sirisë.

Përmes këtij angazhimi intensiv diplomatik, SHBA-ja ka luajtur një rol kyç në ndërmjetësimin dhe arritjen e armëpushimit mes palëve të përfshira, duke synuar rivendosjen e paqes dhe sigurimin e sigurisë për civilët në rajon.

LEXONI GJITHASHTU:

• SHBA shpall armëpushimin mes Izraelit dhe Sirisë dhe konfirmon mbështetjen për paqe
• Përleshje të ashpra mes beduinëve dhe grupeve druze në jug të Sirisë