Ndarja nga jeta e Fatos Nanos, Rexhep Qosja: Një nga figurat më të gjithanshme

Shkrimtari Rexhep Qosja ka reaguar lidhur me ndarjen nga jeta të ish-kryeministrit Fatos Nano. Qosja shkruan se Nano ishte një nga figurat më të gjithanshme të jetës publike shqiptare dhe një politikan me kulturë të gjerë.

Ai shtoi se ndarja nga jeta e Nanos mbyllet një kapitull i gjatë i shndërrimeve në jetën historike të personave që e nisën politikën si mision.

“Lajmi për ndarjen e Fatos Nanos nga jeta më solli një trishtim të heshtur, por edhe një kujtesë të gjallë të një kohe që shënoi zhvillimin e shtetit shqiptar drejt vetëdijes së tij të fuqishme politike.

Fatos Nano ishte një nga figurat më të gjithanshme të jetës publike shqiptare — politikan me kulturë të gjerë, polemist me mendim të vendosur që nuk i fshihte as pasionin, as kontradiktat e veta. Në të shquhej një përmbajtje mendore e vendimmarrëse që i mungon politikës së sotme: ai thoshte, lexonte, dyshonte — cilësi këto të rralla në një botë politike që shpesh shpreh bindje pa vendime!

Në historinë kombëtare shqiptare Fatos Nano do të kujtohet si njeriu që përpiqej të krijonte një raport të ri midis socializmit dhe demokracisë, midis traditës dhe modernitetit, midis njeriut të lirë dhe shtetit të përgjegjshëm.

Sot, me largimin e tij, mbyllet një kapitull i gjithanshëm e i gjatë i shndërrimeve në jetën tonë historike —i njerëzve që e nisën politikën si mision.

Fatos Nano shkoi, por mbeti shëmbëlltyra e tij historikisht e amshuar, e përjetshme si dëshmi e një kohe në të cilën Ai bënte çmos që të ndërtonte lirinë e shtetit për të gjithë përmes arsyes socialiste dhe arsyes demokratike dhe arsyes gjithëkombëtare”, shkruan Qosja.

Ish-kryeministri Fatos Nano është ndarë nga jeta të premten në moshën 73-vjeçare. Prej më shumë se 3 javësh Nano gjendej i shtruar në një spital privat në kryeqytet në gjendje të rëndë.

Nano ndodhej në spital prej datës 8 tetor pas problemeve kronike respiratore. Ish-kryeministri, Nano pësoi arrest kardiak dhe më pas vdekje klinike të trurit. Prej ditësh gjendja e tij shëndetësore ishte e rënduar dhe pa përmirësim. Në 16 shtator të këtij viti, ish-lideri histrorik i PS, Nano festoi ditëlindjen e 73-të.

LEXONI GJITHASHTU:

• Braçe i përlotur mbi arkëmortin e liderit historik: Nano iu dha mundësi të gjithëve
• Detaje nga dinamika e vrasjes në Vlorë, autori: Kisha motiv të fortë