Ndarja nga jeta e Kryepeshkopit Anastas, Baba Mondi: Kontribuoi në harmoninë fetare

Kryegjyshi Botëror Bektashian, Shenjtëria e Tij, Haxhi Dede Baba, Edmond Brahimaj, ka shprehur ngushëllimet më të sinqerta për ndarjen nga jeta të Kryepeshkopit të Kishës Ortodokse Autoqefale të Shqipërisë, Fortlumturisë së Tij, Anastas Janullatos, duke vlerësuar veprën dhe kontributin e tij të jashtëzakonshëm në ringritjen e Kishës Ortodokse dhe harmoninë e bashkëjetesës fetare në Shqipëri.

“Bismilahi Rramani Rrahim! Në emër të Zotit, Mëshiruesit, Mëshirëbërsit!

“Me hidhërim të thellë, mora lajmin e hidhur të kalimit nga kjo jetë e përkohshme të vëllait tonë, Fortlumturisë së Tij, Kryepeshkopit të Tiranës, Durrësit dhe Gjithë Shqipërisë, Anastas Janullatos. Fortlumturia e Tij, Kryepeshkopi Anastas, në kushte të vështira, për më shumë se 30 vite, ringriti Kishën Ortodokse Autoqefale të Shqipërisë dhe kontribuoi në harmoninë e bashkëjetesën fetare në Shqipëri.

“Në emër të Selisë së Shenjtë të Kryegjyshatës Botërore Bektashiane, më lejoni të shpreh konsideratën më të lartë për veprimtarinë e tij gjatë gjithë jetës dhe për bashkëpunimin e ngushtë me të, për promovimin e bashkëjetesës fetare në Shqipëri dhe më gjerë. Kujtimi i Tij do të mbetet gjithmonë një burim mirësie për miliona besimtarë ortodoksë, kudo që ndodhen në botë.”

Kryegjyshi Botëror gjithashtu shpreh ngushëllimet më të sinqerta për humbjen e madhe, duke theksuar se:

“Ngushëllimet më të ndjera për këtë humbje të madhe e të pazëvendësueshme për drejtuesit e lartë të Kishës dhe mbarë komunitetin ortodoks të Shqipërisë. Të prehet në paqen e merituar!”

Kjo humbje e rëndë i vjen si një dhimbje e madhe për të gjithë ata që e njohën dhe e vlerësuan veprën e Kryepeshkopit Anastas, një njeri i devotshëm që dha shumë për forcimin e lidhjeve të bashkëjetesës fetare në Shqipëri.

LEXONI GJITHASHTU:

• Profil/ U shua në moshën 95-vjeçare, kush ishte Anastas Janulltos!
• Mediat ndërkombëtare jehonë ndarjes nga jeta të Kryepeshkopit Anastas Janullatos