Ndërron jetë i moshuari në Vidhas të Elbasanit, banesa u përfshi nga flakët

Një ngjarje tragjike ka ndodhur pasditen e sotme në fshatin Vidhas të Elbasanit, ku një banesë është përfshirë nga flakët, duke shkaktuar humbjen e jetës së një të moshuari, 90-vjeç.

Viktima dyshohet të jetë asfiksuar nga tymi i dendur që përfshiu ambientet e shtëpisë.

Menjëherë pas marrjes së njoftimit, në vendngjarje kanë mbërritur forcat zjarrfikëse dhe ekipet mjekësore, të cilat ndërhynë për shuarjen e flakëve dhe për të dhënë ndihmën e parë. Por, pavarësisht përpjekjeve të shpejta, nuk u arrit të shpëtohej jeta e të moshuarit.

Shkaqet e rënies së zjarrit nuk janë ende të qarta. Autoritetet përkatëse kanë nisur hetimet për të zbardhur plotësisht rrethanat e kësaj ngjarje.

Njoftimi i policisë:

Në fshatin Vidhas, dyshohet se aksidentalisht ka rënë zjarr në banesën e shtetasit D. V., 78 vjeç, i cili dyshohet se si pasojë e asfiksisë, ka humbur jetën.

Grupi hetimor po punon për dokumentimin ligjor të rastit.