Ndeshjet e kthimit në Europa League, ekipet me një këmbë në çerekfinale

Europa League konfirmon këtë të enjte 8 ekipet e kualifikuara më tej edhe pse një pjesë e tyre thuajse e kanë siguruar biletën pas fitoreve në ndeshjet e para. Liverpool, Milan, Marseja dhe Roma, falë fitoreve me diferencë golash kanë hedhur një hap të sigurt drejt çerekfinaleve, teksa ndeshjet e kthimit nuk parashikojnë surpriza. Të kuqtë e Jurgen Klopp mposhtën Sparta Pragën në transfertë në shifrat 1-5, duke mos i lënë asgjë rastësisë, po ashtu Roma fitoi në shtëpi ndaj Brighton 4-0.

Kuqezinjtë e Milanit shënuan 4 herë në portën e Slavias së Pragës, duke pësuar 2, ndërsa çekët shpresojnë se mund të bëjnë dicka ndryshe në ndeshjen e kthimit, teksa në të parën luajtën me 10 lojtarë për minuta të tëra. Leverkuseni, që shihet po ashtu si ekipi surprizë i kontinentit të vjetër, e mbylli përballjen e parë në barazim 2-2, me azerët e Qarabag që ëndërrojnë në një tjetër rezultat pozitiv në transfertë, edhe pse kjo gjë pak gjasa ka të ndodhë. Boniface është mungesa kryesore në kampin e aspirinave, por organika e klubit gjerman premton vijueshmëri.

Të hapura mbeten edhe sfidat e tjera, Rangers-Benfica, West Ham-Freiburg dhe Atalanta-Sporting. Sot konfirmohen 8 ekipet që kalojnë më tej, ndërsa të premten do të njohin dhe kundërshtarët e çerekfinaleve.

LEXONI GJITHASHTU:

• Interi jashtë Champions League, penalltitë “tradhtojnë” zikaltrit
• Barcelona fitore me mungesa, Champions League njeh 2 çerekfinalistë të tjerë