Ndihma për Izraelin dhe Ukrainën/ Johnson do insistojë për miratimin

Kryetari i Dhomës së Përfaqësuesve në Shtetet e Bashkuara, republikani Mike Johnson ka deklaruar se do të tentojë të çojë përpara këtë javë ndihmën për Izraelin, një detyrë e vështirë duke qenë se paketa e sigurisë kombëtare përfshin edhe fondin për Ukrainën.

Johnson ndodhet nën një presion të fortë politik nga kolegët republikanë teksa përpiqet të tejkalojë përçarjen e partisë për të ndihmuar Kievin që të mbrohet nga pushtimi rus.

Kryetari republikan ka pasur në dorë prej dy muajsh paketën prej 95 miliardë dollarësh.

Sulmi i Iranit ndaj Izraelit bëri që ndaj tij të rritet presioni, por i dha gjithashtu Johnson një shans për të nënvizuar urgjencën për aprovimin e fondit.

Johnson tha për kanalin “Fox News” se ai dhe republikanët e kuptojnë nevojën për t’i qëndruar pranë Izraelit dhe shtoi se do të punojë që këtë javë procesi për fondin të avancojë.

“Detajet e paketës po analizohen. Ne po shohim opsionet dhe të gjitha aspektet shtesë”, deklaroi Johnson.

Ndërkohë, lideri i shumicës në Senat, Chuck Schumer tha se presidenti Joe Biden zhvilloi në fundjavë një bisedë telefonike me eksponentët kryesorë të republikanëve dhe demokratëve në Dhomën e Përfaqësuesve dhe Senat, përfshirë Johnson.

Schumer saktësoi se mes liderëve pati konsensus që të ndihmohen si Izraeli edhe Ukraina. “Kjo është jetike për të ardhmen e Ukrainës, për Izraelin dhe Perëndimin”, tha Schumer.

Ndërsa Shtëpia e Bardhë saktësoi se gjatë telefonatave, Biden diskutoi nevojën urgjente që Dhoma e Përfaqësuesve të kalojë paketën e sigurisë kombëtare sa më parë të jetë e mundur.

LEXONI GJITHASHTU: 

• Begaj takohet me Osmanin, merr pjesë në forumin “Gruaja, Paqja dhe Siguria”
• Maqedonia e Veriut, bashkësponsore e rezolutës për Srebrenicën në OKB