Vizita e presidentit Rexhep Taip Erdogan në Shqipëri dhe Serbi, konfirmon ndikimin që dëshiron të shtrijë Turqia në Ballkanin Perëndimor.
Në Shqipëri, ai shprehu interes për vazhdimin e investimeve dhe zgjerimin e tregtisë, e cila përgjatë viteve të fundit është rritur ndjeshëm me shifra që e kanë vendosur shtetin turk në top-listën e shteteve që po ushqejnë ekonominë tonë.
Kështu përgjatë 5 viteve të fundit, shkëmbimet tregtare janë rritur rreth 70%, duke arritur në 900 mld dollarë dhe ambicia është që ato të arrijnë në 2 mld dollarë. Edhe kompanitë me kapital turk janë shtuar në vend, duke hapur mbi 15 mijë vende pune.
Nga ana tjetër, ritmi i rritjes në Serbi ka qenë i shpejtë, pas vizitës së presidentit Erdogan në Beograd në vitin 2017. Prej asaj kohe, tregtia është rritur 150% dhe numri i firmave që operojnë, pothuajse është 5-fishuar.
Turqia i furnizon të dy vendet me shumicë me hekur, çelik, makineri e plastikë. Ndërkohë, Serbia e furnizon me goma e pajisje e elektrike, ndërsa Shqipëria me bakër, alumin dhe fara bimore.
Në gjuhën e shifrave është e vështirë të thuash nëse Erdogan do të zgjidhte mes Ramës ose Vuçiçit, por megjithatë ai ka ushtruar ndikim tek ne, për përhapjen e arsimit dhe besimit fetar mysliman, një ndikim që nuk e ka përhapur dot në mes serbeve ortodoksë. Edhe në teknologjinë e armatimeve furnizimet janë te hapura për të dy vendet, por koha do ta tregojë nëse ka zgjedhur të fuqizojë njërin apo tjetrin shtet.
LEXONI GJITHASHTU:
- Erdogan nga Beogradi: Marrëdhëniet me Serbinë janë në kohë të artë
- Presidenti turk Erdogan mbërrin në Beograd për bisedime zyrtare
