Ndreca i pandehur nga SPAK, Bardhi: Deputeti gënjeu publikisht

Pasi SPAK njoftoi se ka marrë të pandehur deputetin socialist Plarent Ndreca, ka ardhur reagimi i parë nga Partia Demokratike.

Kreu i grupit parlamentar të PD, Gazment Bardhi përmes një reagimi në rrjetin social facebook shkruan se deputeti i Edi Ramës gënjeu publikisht kur deklaroi se është e pavërtetë që është nën hetim nga SPAK.

Më tej Bardhi thotë se e vërteta është që tenderat publik në qeverinë e Edi Ramës janë kthyer në mundësi vetëm për klientë të paracaktuar, duke eleminuar garën dhe meritokracinë.

Reagim i kryetarit të grupit parlamentar të PD, Gazment Bardhi:

Deputeti i Edi Ramës gënjeu publikisht kur deklaroi se është e pavërtetë që është nën hetim nga SPAK. Por, gënjeshtra mbulon zullumin vetëm për disa orë apo ditë, por e vërteta triumfon përgjithmonë!

E vërteta është që tenderat publik në Qeverinë e Edi Ramës janë kthyer në mundësi vetëm për klientë të paracaktuar, duke eleminuar garën dhe meritokracinë. Klientelizmi dhe korrupsioni janë e vetmja formë për të bërë biznes në Shqipëri gjatë qeverisjes së Edi Ramës.

Për këtë nevojiten zyrtar publik si Plarent Ndreca, që për shërbimet në shkelje të ligjit, për mbështetjen ndaj klientelizmit dhe korrupsionit, shpërblehen nga Edi Rama duke u promovuar si deputet!