Netanyahu mbron luftën në Gaza në Kongresin amerikan: Lufta jonë, lufta juaj

Kryeministri izraelit Benjamin Netanyahu shpërtheu ndaj protestuesve që kundërshtojnë luftën kundër Hamasit në Gaza, duke i cilësuar manifestuesit si “idiotët e dobishëm të Iranit”.

Gjatë një fjalimi në Kongresin amerikan, kryeministri përdori një ton luftarak, teksa u zotua se do të vazhdojë të luftojë derisa të arrijë fitoren.

Netanyahu iu drejtua ligjvënësve amerikanë duke thënë se, kanë të njëjtët armiq. “Kur ne luftojmë me Iranin, ne luftojmë armikun më radikal dhe më gjakatar të Shteteve të Bashkuara të Amerikës. Lufta jonë është edhe lufta juaj dhe fitorja jonë do të jetë edhe e juaja”, tha Netanyahu.

Duke reaguar ndaj braktisjes së fjalimit të tij nga shumë kongresmenë demokratë, Netanyahu theksoi se Amerika dhe Izraeli duhet të vazhdojnë partneritetin.

“Që forcat e qytetërimit të triumfojnë, Amerika dhe Izraeli duhet të jenë së bashku. Sepse kur jemi së bashku ndodh diçka shumë e thjeshtë; ne fitojmë dhe ata humbin”, vijoi Netanyahu.

Por ovacionet e shumta nuk mundën ta fshihnin faktin se të paktën 39 ligjvënës munguan gjatë fjalimit. Thuajse të gjithë ata ishin demokratë dhe mes tyre ishte edhe ish-kryetarja e Dhomës së Përfaqësuesve, Nancy Pelosi, e cila tha se vizita e Netanyahut kishte qenë e papërshtatshme. Edhe zëvendës presidentja Kamala Harris nuk e ndoqi fjalimin për shkak të agjendës së ngarkuar.

I vetëdijshëm se Donald Trump mund të rikthehet në Shtëpinë e Bardhë, Netanyahu e falënderoi atë për zhvendosjen e ambasadës amerikane në Jerusalem dhe për njohjen e sovranitetit izraelit në Lartësitë Golan, një territor që Izraeli ia mori Sirisë në vitin 1967.

LEXONI GJITHASHTU:

• Erdogan: Biden dhe administrata e tij po marrin pjesë në krimet e luftës në Gaza
• Lufta në Gaza| Australia emëron të dërguar të posaçme për trajtimin e antisemitizmit