Nga videot për TikTok te pilotimi i dronëve, eksperienca e studentëve të huaj në Shqipëri

Të huajt po zgjedhin gjithnjë e më shumë universitetet shqiptare për të ndjekur studimet e larta. Mes tyre është edhe Jesus Fernandez Plata, student spanjoll, i cili prej dy muajsh ndjek një program praktike në degën e marketingut në një universitet në Shqipëri, në kuadër të programit Erasmus.

“Universitetet këtu, disa prej tyre, kanë kushte më të mira se shumë universitete në Spanjë. Keni pajisje shumë të mira, kam pasur mundësinë të pilotoj dronë, të regjistroj video, të punoj me shitjet online dhe të përfshihem në shumë projekte kreative”, është shprehur ai.

Ai thotë se një nga gjërat që e ka surprizuar më shumë është mundësia për t’u përfshirë direkt në projekte praktike, aktivitete kreative dhe eksperienca të ndryshme gjatë studimeve.

“Vetëm pak ditë më parë po xhironim video për TikTok te Universiteti Politeknik, së bashku me disa studentë ndërkombëtarë, sidomos italianë dhe studentë Erasmus”, tha ai.

Sipas të dhënave të publikuara për vitin akademik 2023-2024, në universitetet shqiptare janë regjistruar rreth 2,161 studentë të huaj. Shumica e tyre ndjekin programe Master, që zënë afro 68.6% të totalit, ndërsa rreth 30.5% janë në Bachelor. Vitet e fundit është rritur interesi edhe nga Italia, Turqia, si dhe vende të Lindjes së Mesme dhe Azisë.

Degët më të preferuara mbeten mjekësia, infermieria, farmacia, programet ekonomike dhe teknologjia e informacionit, ndërsa universitetet që tërheqin më shumë studentë të huaj janë Universiteti i Mjekësisë Tiranë, Universiteti i Tiranës dhe universitetet private që ofrojnë programe në gjuhën angleze.