Ngjitet në skenën e Durrësit komedia “Vendi më i humbur në Shqipëri”

Me humor, ironi dhe reflektim mbi harresën, “Vendi më i humbur në Shqipëri” ngjiti në skenën antike të Amfiteatrit të Durrësit historinë e një fshati që nuk gjendet në asnjë hartë, por ku banorët nuk heqin dorë nga ëndrra për ta kthyer në një atraksion turistik.

Një komedi franceze, e sjellë nga një regjisore shqiptare, u ndërthur me magjinë e një monumenti antik për të krijuar një premierë të veçantë për publikun.

Vepra e autorit Jean–Pierre Martinez, me regji nga Andia Xhunga, u interpretua nga trupa e teatrit “Aleksandër Moisiu”.

Një histori që lind si komedi, por që mbart një mesazh serioz për dëshirën për të mos mbetur të humbur.

Andia Xhunga, regjisore tha se: “Vendi më i humbur në Shqipëri është vetë Shqipëria.”

Ndërsa Alketa Tragaj, skenografe dhe kostumografe u shpreh se: “Durrësi këtë verë është më shumë se një destinacion turistik, është një qendër e gjallë arti dhe kulture. Sot jemi në Amfiteatrin e qytetit të Durrësit, ku po shfaqet një vepër komike, një komedi e bukur me nota satire, e luajtur nga trupa e mrekullueshme e Teatrit ‘Aleksandër Moisiu’,” tha ajo.

E mirëpritur nga publiku, “Vendi më i humbur në Shqipëri” premton të udhëtojë edhe në qytete të tjera, duke kujtuar me humor dhe finesë se edhe vendet më të harruara mund të rizbulohen, nëse nuk humbasim shpresën.

LEXONI GJITHASHTU:

• Botohet në Devoll vëllimi poetik “Ditët e mia pa ty” i Skënder Rusit
• Roboti Melisa në Durrës, në shërbim të klientëve në pastiçeri