Ngrihet aktakuzë në mungesë për krime lufte në Kosovë

Prokuroria Speciale e Kosovës ka ngritur aktakuzë në mungesë kundër një personi me inicialet V.N., i dyshuar për krime lufte gjatë periudhës 1998-1999. Sipas aktakuzës, V.N. akuzohet për vrasjen e dy personave dhe plagosjen e një tjetri në qytetin e Suharekës, në bashkëpunim me forcat policore dhe ushtarake serbe.

Prokuroria ka deklaruar se i pandehuri është i paarritshëm, duke përmbushur kushtet ligjore për ngritjen e aktakuzës në mungesë. Rasti tashmë është transferuar në Departamentin Special të Gjykatës Themelore në Prishtinë.

Kjo është aktakuza e dytë për krime lufte në mungesë e ngritur gjatë dhjetorit, ndërsa deri më tani janë ngritur gjithsej 33 aktakuza për krime të tilla, që përfshijnë 89 persona.

Nga përfundimi i luftës, mbi 70 persona janë dënuar për krime lufte në Kosovë, ndërsa mbi 1.600 të zhdukur vazhdojnë të jenë ende të pagjetur.