Pas një viti pezullim në Gjykatën e Posaçme ka nisur gjykimi në mungesë për Altin Hajrin, pronarin e “Golden Resort”, i përfshirë në rrëmbimin dhe vrasjen e Jan Prengës. Këtë të mërkurë, SPAK lexoi kërkesën për gjykim për Hajrin, ku ndaj tij i janë ngarkuar veprat penale të rrëmbimit dhe mbajtjes peng me pasojë vdekjen.
Hajri ndodhet në arrati, ndërkohë që përfaqësohet nga avokati Arbër Hoxha. Ky i fundit ka pretenduar se klienti i tij është i pafajshëm dhe, sipas tij, nuk ka marrë pjesë as në rrëmbim dhe as në zhdukjen e trupit të Prengës.
Po ashtu, mbrojtja ka kërkuar që të merret parasysh edhe vendimi i Gjykatës së Lartë, që prishi dënimin me burg përjetë për kopshtarin e “Golden Resort”. Gjykata pranoi që pjesë e procesit të bëhen edhe dëshmitarë, të cilët kryesisht janë lidhje të afërta të Altin Hajrit.
Ky i fundit ka edhe një masë tjetër sigurie për dosjen e ish-deputetit socialist Jurgis Çyrbja. Gjykata i ka caktuar në mungesë masën “arrest me burg”, pasi dyshohet se bisedonte në aplikacionin Sky ECC për favorizime në procese gjyqësore apo dekonspirimin e operacioneve policore.
LEXONI GJITHASHTU:
- Pamjet filmike ‘fundosin’ kopshtarin për vrasjen e Jan Prengës
- Dy rrëmbimet e bujshme, humbja e gjurmëve të Jan Prengës dhe Ervis Martinajt
