Nis groposja e 300 mijë shpendëve në Durrës

Masivët me pula të ngordhura në pularitë e Durrësit dhe Shijakut po rrezikojnë shëndetin e punonjësve dhe shpërthimin e ndonjë epidemie tek njeriu.

Prej një jave në këtë zonë kanë ngordhur mbi 300 mijë shpendë nga gripi i shpendëve, për të cilët përfaqësuesit e pularive kërkojnë ndihmë.

“Situata ka ngelur në një ngërç ligjor ndërmjet Ministrisë së Bujqësisë dhe Ministrisë së Mjedisit. Në dijeninë tonë, Shtabi i Emergjencës është mbledhur dhe po mundohet të gjejë një vend për groposjen e karkasave”, u shpreh përfaqësuesi i një pularie.

Ministria e Bujqësisë nuk ka nxjerrë urdhër të shkruar, por deklaron se ka asgjësuar të gjitha pulat të ngordhura dhe bën thirrje që pularitë e vendit të raportojnë për gjendjen e shpendëve të tyre.

“Të gjithë shpendët janë groposur. Vazhdon gjurmimi dhe testimi në pulari. I bëjmë thirrje gjithë pularive dhe fermerëve, që në rast dyshimi për grip shpendësh, duhet të kontaktojnë Autoritetin Kombëtar të Veterinarisë”, u shpreh Ermira Gjeci.

Tregu i mishit dhe vezëve po funksionon normalisht deri më tani, por nga Kosova ka një vendim që ndalon përkohësisht importin e pulave.

LEXONI GJITHASHTU:

• Gripi i shpendëve, 3 pelikanë të ngordhur në Liqenin e Prespës
• Asnjë rast të gripit të shpendëve në vend, dhjetëra pelikanë ngordhin në Greqi