Nis kompeticioni spektakolar i Champions League, 6 duele interesante

Kompeticioni më spektakolar për klube në botën e futbollit nis në mbrëmje me fazën e ligës. Champions League zhvillon 6 duelet e para të cilat priten me shumë interes. Rekordmenët e kompeticionit, Reali i Madridit, Juventus, Arsenal, apo edhe kampionët në fuqi të Europa League, Tottenham, janë disa nga ekipet që do të provojnë veten këtë të martë.

Më interesant është padyshim dueli që luhet në “Allianz” të Torinos, ku Juventusi, pas asaj fitores spektakolare ndaj Interit në kampionat, vjen me moralin lart dhe i bindur se suksesin mund ta përsërisë ndaj verdhezinjve. Këta të fundit gjithmonë kanë treguar se forma në Bundesligë nuk ka asnjë ngjashmëri me atë çka prodhojnë në kompeticionet evropiane. Dortmundi vjen me 9 mungesa në këtë duel të vështirë, ndërsa bardhezinjtë e Tudor nuk kanë pjesë të tyre yllin e Kosovës, Edon Zhegrova.

Athletic Bilbao-Arsenal po ashtu do të jetë një duel interesant që do të konfirmojë forcën e topçinjve në nisje të këtij rrugëtimi të ri evropian. Sa i përket Realit të Madridit, ai pret në shtëpi Marsejën e De Zerbit, e cila po ashtu vjen me moralin lart pas fitores 4-0 në Ligue 1. Nga Europa League në Champions, Tottenhami do të tregojë nëse vërtet i ka kapacitetet të përballet me emrat e mëdhenj, ku kundërshtari i parë është Villarreali. 2 duelet e tjera të së martës janë PSV-Royale Union dhe Benfica-Qarabag.

LEXONI GJITHASHTU:

• UEFA pranon kërkesën e Serbisë, ndryshohet stadiumi për ndeshjen ndaj Shqipërisë
• Një tjetër ndryshim në listën e Shqipërisë, largohet portieri i kuqezinjve
• Ndryshon lista e kombëtares: Mbrojtësi shqiptar braktis kuqezinjtë, zgjedh Zvicrën