Nis punën Komisioni i Posaçëm anti-Korrupsion, opozita bojkoton mbledhjen

Ka nisur të mbahet në ambientet e Kryesisë së Kuvendit mbledhja e parë e Komisionit të Posaçëm anti-Korrupsion.

Ajo që bie në sy është mungesa e opozitës, e cila ka zgjedhur të mos marrë pjesë në punimet e komisionit.

E pranishme në mbledhjen e parë, atë të konstituimit është edhe Kryetarja e Kuvendit Lindita Nikolla, si dhe ministrja e Shtetit për Marrëdhëniet me parlamentin, Elisa Spiropali.

8 anëtarë të mazhorancës janë të pranishëm në mbledhje, të mjaftueshëm për të arritur kuorumin e duhur për të nisur mbledhja.

Në nisje të mbledhjes kryetari i komisionit, Fatmir Xhafa shprehu keqardhje për mungesën e opozitës, por u shpreh se ka bindjen se procesi do të jetë gjithëpërfshirës

“Të adresojmë disa sfida në mënyrë që në 2030 Shqipëria të jetë me të drejta të plota në BE. Kam bindjen se do jetë një proces gjithëpërfshirës. Roli i opozitës është tejet i rëndësishëm dhe pjesemarrja e saj është me rëndësi . Jam i keqardhur që opozita nuk i është përgjigjur kësaj ftese për pjesemarrje dhe angazhim. Çështjet që pritet të diskutohen janë me rëndësi jetike për qytetarët, shkojnë përtej rëndësisë partiake”, tha deputeti socialist.

Xhafa tha se mungesa e opozitës në komision, i rikthen në vëmendje situatën e reformës në drejtësi në vitin 2014, ku fillimisht opozita e bojkotoi komisionin dhe më pas iu bashkua procesit pas reflektimit që pati. Ai tha se shpreson që kjo gjë të ndodhë përsëri.

“Kjo situatë më sjell në vëmendje reformën në drejtësi në vitin 2014 kur nisi punën komisioni, opozita nuk mori pjesë në mbledhjen e parë atë të konstituimit dhe disa mbledhje të tjera. Opozita reflektoi me vonesë dhe u kthye, koha tregoi se gabuan, shpresoj që të mos vijojnë në këtë mënyrë dhe shumë shpejt të jenë pjesë e komisionit”, tha Xhafa.

LEXONI GJITHASHTU:

• Me 76 vota pro, miratohet rezoluta anti-korrupsion e propozuar nga PS
• PS nuk humbet kohë, mblidhet nesër komisioni anti-korrupsion