Një dhomë për të gjithë bizneset/ Qeveria kërkon bashkimin e gjithë sipërmarrjeve

Bizneset në vend duhet të mbrohen nga një dhomë e vetme, e cila do të quhet dhoma shtetërore ekonomike. Kjo nismë e qeverisë synon të bashkojë të gjitha sipërmarrjet në një shoqatë, e cila do të mbledhë edhe kuotat vjetore.

Një dhomë shtetërore Ekonomike që do të bëjë bashkë të gjithë bizneset në vend. Kjo është nisma e fundit e qeverisë, e cila në fakt rikthehet si një ide e lënë pezull para 8 vitesh.

Dokumenti për të krijuar një dhomë unike është çuar për konsultim tek shoqatat e bizneseve, aty ku argumentohet se sipërmarrjet sot nuk janë të mbrojtura dhe të gjithëpërfshira dhe kanë një organizim të çrregullt.

Më tej thuhet se nevoja për këtë riorganizim, vjen pasi bizneset, deri më tani përfaqësohen me 180 dhoma ekonomike.

Në thelb, nisma kërkon që bizneset do të anëtarësohen me detyrim dhe të paguajnë një kuotë të caktuar në varësi të xhiros. Më tej, janë transparenca, llogaridhënia dhe rritja e nivelit të përfaqësimit brenda dhe jashtë vendit, objektivat e kësaj reforme.

Qeveria sjell një sërë modelesh për organizmin dhe mbrojtjen e bizneseve në disa prej vendeve të Europës, si referencë që shoqatat ta pranojnë këtë unifikim.

Në vitin 2016 qeveria e hodhi për konsultim një nisëm të tillë, por u tërhoq pas kundërshtimeve të forta të sipërmarrjes. Bizneset e konsideruan taksë t`ë mirëfilltë, nga e cila nuk përfitojnë shërbime shtesë.