Një fëmijë me sindromën down, nëna: Është dashuria ime, le të thonë ç’të duan

”Thosha sikur Zoti të më japë një fëmijë me sindromën down, unë nuk do e heq”…

Kjo ndjesi brenda zemrës së Blerinës, ndodhi në realitet. Prej një viti ka ardhur në jetë vajza e tretë e saj, Altea.

“Ka qenë e papritur në fakt. Me shtatzëninë e Alteas çdo gjë ka shkuar mirë, me ekot…E laja, vajza nuk qante, ishte shumë e urtë. Do jetë e urtë nga natyra thosha, nuk më shkoi mendja për sindromën down”, tregon Blerina Toçila.

Lajmin për ketë diagnozë të vajzës ja tha bashkëshorti. Menjëherë i lindën shumë pikëpyetje e dyshime në kokë.

“Gjëja e parë që u frikësova ishte si do ja bëj unë tani, çfarë nevojash ka? Ajo do jetë sëmurë unë, s’do e kuptoj, kjo më vriste më shumë…Hyja, lexoja në internet dhe çfarë nuk thuhej, më mirë të mos i lexosh, sepse japim modelin më të shëmtuar të sindromës down…Pastaj thashë mblidhe mendjen, sepse ky është fëmija jot, do e rrisësh”, shprehet ajo.

Ky vit me Altean në krah ka qenë sa i bukur dhe sfidues. Blerina, duhet të udhëtojë të paktën tri herë në javë nga Gramshi, për në Tiranë, që vajza e saj të marrë terapitë që duhen.

Down sindromë Albania ka marrë përsipër kryerjen e terapive falas, duke e lehtësuar sado pak Blerinën.

Të kesh një fëmijë me një kromozom më shumë është bekim, thotë Blerina, ndaj ka një përgjigje për këdo që mund të hedhë disa shikime paragjykuese.

“Ndoshta e mbajnë të fshehur dhe nuk ka thonë, por që edhe të më thonë, unë vajzën e kam dashuri. Të thonë çfarë të duan, nuk me intereson”, thotë Blerina.

LEXONI GJITHASHTU:

Dita botërore e sindromës Down, Kushi: Të reflektojmë, këta fëmijë duan mbështetje

23-vjeçari me sindromën Down: Nuk munda të studioja për sporte, nuk u pranova