Njoftoi njohjen e Palestinës si shtet, Macron përplaset me SHBA-të dhe Izraelin

Presidenti francez Emmanuel Macron ka njoftuar se Franca do të njohë Palestinën si shtet, me shpresën se kjo lëvizje do të ndihmojë në vendosjen e paqes në rajon.

Përmes një postimi në rrjetin “X”, Macron tha se vendimi do të formalizohet në Asamblenë e Përgjithshme të OKB-së në shtator.

“Në përputhje me angazhimin e saj historik për një paqe afatgjatë në Lindjen e Mesme, unë kam vendosur që Franca të njohë shtetin e Palestinës”, tha Macron, duke shtuar se, “paqja është e mundur”.

Ai bëri gjithashtu thirrje për një armëpushim në Gaza, kthimin e pengjeve dhe që ndihmat humanitare të arrijnë tek palestinezët.

Një tjetër apel ishte ai për demilitarizimin e lëvizjes së Hamasit. Por deklarata e tij mori një seri kritikash të ashpra nga Shtetet e Bashkuara dhe Izraeli.

“Shtetet e Bashkuara e refuzojnë me ashpërsi planin për të njohur shtetin e Palestinës në Asamblenë e Përgjithshme të OKB-së”, tha sekretari i Shtetit, Marco Rubio në një postim në “X”.

Sipas tij, ky vendim “i pamatur” i shërben vetëm propagandës dhe minon përpjekjet për paqen. “Gjithashtu, ajo është një shuplakë në fytyrë për viktimat e 7 tetorit”, shtoi Rubio.

Me të njëjtën qasje, kryeministri izraelit Benjamin Netanyahu e quajti vendimin një “akt tradhtie” nga një aleat i ngushtë, që do të promovojë terrorizmin.

Megjithatë, lëvizja e Macron mori edhe vlerësime nga vende të shumta evropiane dhe liderë të vendeve arabe.

LEXONI GJITHASHTU:

• Pas Francës edhe Britania mbështet njohjen e shtetit palesinez, por pa afat kohor
• Britania dhe 24 shtete të tjera dënojnë vrasjen e qindra banorëve në Gaza