“Nuk jemi han me 40 porta”- Eksperti: Me bangladeshasit s’ka garanci! Vijnë dhe ikin

Eksperti i ekonomisë Fatos Çoçoli analizoi në studion e Euronews Albania, tregun e punës së të huajve që vijnë në vendin tonë.

Çoçoli deklaroi se punëtorët që vijnë nga India apo Bangladeshi e shohin Shqipërinë si një trampolinë për të shkuar në një vend tjetër të Bashkimit Evropian.

Kjo sipas tij dëmton bizneset shqiptare, të cilat i paguajnë atij punëtori qoftë edhe biletën e avionit për të ardhur në Shqipëri.

Eksperti nënvizoi se shteti shqiptar duhet të ndërhyjë, duke u lidhur me ministritë e atyre vendeve që të ketë përgjegjësi për ata që shkelin kontratat e punës.

“Ai bangladeshasi të punon dy muaj ose 6 muaj dhe pastaj ai e shikon si një trampolinë Shqipërinë për të shkuar në një vend tjetër me paga më të larta. Dhe kështu ka ndodhur. Pra nëse kemi pasur 600 bangladeshas, deri tani 95% janë larguar nga Shqipëria.

Nuk ke asnjë garanci dhe kompanitë e fasonërive që kanë nevojë për punonjës një copë firmë nuk u mjafton si garanci, sepse sapo gjejnë një kontratë në Gjermani apo një vend tjetër, ky punonjës nga India apo nga Bangladeshi largohet.

Prandaj duhet rregulluar dhe duhet ndërhyrja e shtetit. Duhet që shteti të lidhet me ministritë e atyre vendeve dhe në mënyrë që të ketë dhe një përgjegjësi të këtyre punëtorëve që largohen.

Sepse këtu nuk është han me 40 porta, vjen qëndron 2 muaj dhe pastaj largohet në një vend tjetër ku paga është më e lartë”, tha Çoçoli.

LEXO GJITHASHTU:

• Shëndetësia| Shqiptarët 43% e paguajnë nga xhepi, ilaçet e shtrenjta nuk rimbursohen
• Indianët në piramidën e Enverit, shqiptarët “zëvendësohen” me të huaj në ndërtim