“Nuk ka ndodhur kurrë”, qytetarët flasin për fenomenin e pazakontë në Vlorë

Sipërfaqja ujore e detit në Vlorë është tkurrur, deti është tërhequr rreth 100 metra kjo si pasojë e fenomenit të zbaticës.

“Në këtë kohë s’ka bërë vaki ndonjëherë kaq tërheqje deti, po të shkosh në plazhin e vjetër atje ka ikur rreth 60 metra deti. Në kohën e dimrit deti ka marrë shumë nga toka,” – u shpreh një qytetare.

“Si ky fenomen nuk ka ndodhur ndonjëherë në Vlorë. Unë jam vlonjat i vjetër,” – tregoi një tjetër.

Për ambientalistët fenomeni mbetet natyror, por rritja e përmasave nga viti në vit është shqetësues për ekosistemin.

“Dëmtohet kjo pjesa e ekosistemit detar që ngelet e zbuluar, që s’ka qenë asnjëherë e zbuluar, ajo dëmtohet plotësisht dhe do kohë të rikthehet jeta aty të vitalizohet. Më tepër është një indikator që ne të kuptojmë ç’ po ndodh, për të tërhequr vëmendjen njerëzve, vendimmarrësve, qytetarëve që ta ruajnë e kursejnë natyrën,” – u shpreh ambientalisti Simo Ribaj.

Gjeologët e shpjegojnë këtë fakt me afrimin e ekuinoksit pranveror në 21 mars. Një tjetër faktor është presioni i lartë atmosferik. I njëjti fenomen është shfaqur edhe vitin e kaluar edhe në Shëngjin.

LEXONI GJITHASHTU:

• Deti i Vlorës tërhiqet më shumë se vitet e kaluara, pse po ndodh kjo zbaticë?
• Goditet grupi kriminal në Vlorë, sekuestrohen veshje si të policisë dhe municione