OKB akuzon Shqipërinë se i ka dërguar armë Kongos duke shkelur rregullat ndërkombëtare

Kombet e Bashkuara kanë akuzuar Shqipërinë, por edhe vende të tjera, se kanë dërguar armatime në Republikën Demokratike të Kongos.

Ndonëse vendi afrikan nuk është subjekt i sanksioneve dhe embargove, dërgimi i armëve duhet të bëhet duke njoftuar OKB-në, gjë që është anashkaluar nga vendi ynë dhe shtete të tjera si Rumania, Turqia, Afrika e Jugut, Izraeli, Kina, Irani, etj.

Raporti i Kombeve të Bashkuara është konfidencial, por u sigurua nga agjencia e lajmeve “AFP” këtë javë.

“Disa nga këto armatime, të destinuara për ushtrinë vendase, kanë përfunduar më pas në duart e grupeve të armatosura”, thuhet në raportin e OKB-së.

Në raport nuk flitet vetëm për armë, por edhe për instruktorë dhe pajisje ushtrie, që sipas OKB-së kanë ardhur nga Shqipëria, Turqia, Rumania, Izraeli, Afrika e Jugut, Kina, Irani, Mbretëria e Bashkuar, Koreja e Veriut, Shtetet e Bashkuara të Amerikës dhe nga Sudani.