OKB: Të paktën 55 emigrantë të mbytur pranë Libisë

Një varkë gome që transportonte dhjetëra emigrantë në Evropë u fundos në brigjet e Libisë dhe së paku 55 persona u mbytën, duke përfshirë gra dhe fëmijë, njoftoi të mërkurën OKB.

Organizata Ndërkombëtare për Migracionin (IOM) njoftoi se katastrofa ka ndodhur të martën. Varka mbante rreth 60 emigrantë dhe u nis nga qyteti bregdetar Garabouli, në lindje të kryeqytetit libian, Tripoli.

Agjencia bëri me dije se pesë emigrantë i mbijetuan fundosjes së anijes dhe u sollën përsëri në breg nga rojet bregdetare libiane. Nuk ishte menjëherë e qartë se çfarë ndodhi me varkën.

Safa Msehli, zëdhënëse e IOM-it, tha se anija u përmbys menjëherë pasi u largua nga Garabouli. Ajo u shpreh se rojet bregdetare libiane deri më tani ka nxjerrë trupat e nëntë burrave dhe një fëmije.

Në mesin e pesë të mbijetuarve ishin katër burra – tre pakistanezë dhe një egjiptian – dhe një fëmijë sirian, tha Msehli për Associated Press.

Kjo është ngjarja e fundit në serinë e tragjedive në Detin Mesdhe, rrugë kyçe kjo për emigrantët.

LEXONI GJITHASHTU:

• Ekzekutimi i Fatmatës, avokati: Maqedonia ka polici të egër, ne s’vrasim emigrantë
• Gazetari: Alibeaj ka frikë të futet në zgjedhje, e do Berishën si alibi për humbjen