‘Omicron’ nga një person me HIV/AIDS, epidemiologët: Nuk është e vërtetuar, por s’përjashtohet si mundësi

Mjeku Ilir Alimehmeti tha në emisionin ‘Now’ në Euronews Albania, se nga mjekët në Afrikën e Jugut, ku janë zbuluar 77 raste të variantit Omicron, nga 166 në gjithë botën, deri tani flitet për simptoma të lehta, por nisur nga numri i lartë i mutacioneve të këtij varianti mendohet se transmetueshmëria e tij të jetë e lartë.

Ai tha se nuk ka asgjë të vërtetuar se personi i parë bartësi këtij mutacioni ka qenë gjithashtu bartës i HIV/AIDS, por shtoi se është e mundshme që kjo të ketë ndodhur, pasi tek personat me imunitet të ulët si ata të prekur nga AIDS apo sëmundje të tjera të rënda, mundësia që virusi të largohet është e vogël.

Nëndrejtori e ISHP, Dritan Ulqinaku tha se kjo është arsyeja pse OBSH po apelon për sa më shumë vaksinime pasi në organizmat ku virusi qëndron për një kohë më të gjatë ka më shumë gjasa të pësojë mutacione.

“Politika e OBSH dhe të gjitha organizatave ndërkombëtare është që të bëhet sa më shpejt vaksinimi në mënyrë që të mos lejohet përhapja e këtyre mutacioneve”, tha mjeku Ulqinaku.