Operacioni “Partners in crime” në Librazhd: Në pranga 3 persona për vjedhje me dhunë

Policia e Librazhdit në bashkëpunim me policinë Elbasan ka finalizuar me sukses operacionin e koduar “Partners in crime”, duke goditur një grup të dyshuar për vjedhje me dhunë në zonën e fshatit Sheje.

Sipas njoftimit zyrtar, në pranga kanë rënë dy shtetas, V. K., 32 vjeç, nga Shkodra dhe M. K., 33 vjeçe, nga Tirana, të cilët dyshohet se në datat 25 dhe 27 korrik kanë grabitur me dhunë dy të moshuar në Sheje, duke u marrë portofolin, çantën dhe celularin.

Të moshuarit kanë pësuar dëmtime të lehta, ndërsa njëra prej tyre është trajtuar në spitalin e Librazhdit dhe ndodhet jashtë rrezikut për jetën.

Në kuadër të hetimeve, është arrestuar edhe një 41-vjeçar nga Pogradeci, E. Sh., pasi rezulton se ka blerë një prej celularëve të vjedhur nga dy autorët kryesorë.

Gjatë operacionit janë sekuestruar katër celularë përfshirë atë që i është marrë 62-vjeçares çanta e vjedhur, një automjet i marrë me qira nga autori V. K., si dhe veshje dhe kapuçë që dyshohet se janë përdorur gjatë kryerjes së vjedhjeve.

Policia bën me dije se hetimet vijojnë për zbardhjen e plotë të veprimtarisë kriminale të këtij grupi dhe të mundësisë së përfshirjes së tyre në ngjarje të tjera të ngjashme.

Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme procedurale.